【Emily】向劏房戶介紹簡屋過渡房 何永賢囑「踏出一步」

【明報專訊】「解決劏房問題」工作組推展緊多項工作，作為組長嘅副財政司長黃偉綸同副組長嘅房屋局長何永賢，前晚由民建聯立法會議員鄭泳舜陪同到深水埗，探訪咗兩個劏房戶，了解佢哋生活狀况。黃偉綸噚日喺facebook提到，工作組正研究包括為「劏房」居住環境設定最低標準，例如樓宇安全、消防同衛生要求、居住面積等；針對唔合最低標準劏房提出取締方法；防止唔到最低標準嘅劏房再增加等，確保按部就班取締劣質劏房，同埋充分考慮過渡同後續問題。佢話會按計劃適時向特首提交建議。

黃偉綸又話，呢次探訪兩戶個案都有啲共通點，就係居住環境擠迫，無獨立廚廁同衛生欠佳。佢同何永賢向兩戶介紹咗未來將陸續有公營房屋、過渡房屋、簡約公屋落成，同埋關注劏房租務管制實施保唔保護到佢哋權益。何永賢亦喺facebook話，期待佢哋鼓起勇氣踏出一步，為自己同家人生活改變。

鄭泳舜亦發帖話，告別劣質劏房唔係一蹴即就，希望當局能多方面協調和籌劃，包括適時檢討已實施兩年嘅劏房租管，同埋完善好過渡屋同簡約公屋配套等。