【Emily】發展局話基建可抵7度震感地震

【明報專訊】大嶼山前日發生2級地震，震央位於梅窩，引起公眾關注，發展局噚晚都喺facebook發文籲大家毋須擔心，強調本港唔喺活躍地震帶上，地震風險相當低，仲話現時嘅基建同樓宇設計標準都提供足夠保障。局方仲話香港基建已包含抗震設計，可抵禦震感達7度嘅地震，同埋大部分建築物都可抵禦地震風險，而屋宇署之前已成立督導委員會，正就唔同建築物設計實例作比較研究，會防患未然，預計顧問今年內完成比較研究，會喺明年初徵詢建築業界意見。

發展局話，過去40多年間震央位於香港境內所引發嘅有感地震都屬輕微，亦只係偶然發生，多年研究結果顯示香港本土或離岸地區都冇明顯嘅近代斷層活動迹象。

林超英：大嶼數次地震料處同一斷層

天文台前台長林超英噚日喺fb都話，1979年以嚟香港有9宗震央喺境內嘅地震；又分享咗一張衛星地圖及一張斷層圖，標出震央喺香港境內嘅地點，除咗今次外，有4宗喺愉景灣對開嘅大白灣範圍，大欖涌同米埔各一次。林超英標示出地震點同斷層位置做對比，話之前發生嘅愉景灣地震位置，同前日嘅震央似乎喺同一斷層。