【Emily】選民登記運動下月開始 跨部門聯絡專才 籲攞永居做選民

【明報專訊】今年嘅選民登記運動即將開始，翻查政府提交立法會嘅文件，發現今年新增鼓勵新來港者同專才計劃成員喺獲得永久居民身分後登記選民嘅項目。選舉事務處話，留意到近年唔少人因應政府吸納人才措施來港定居，為及早向佢哋宣傳選民登記資訊，選舉處會聯同勞福局、入境處同各區民政事務處聯繫佢哋，鼓勵佢哋取得永久居民身分做選民登記。

「智方便+」年內可更新電話電郵

另外，選舉處繼上年嘅先導計劃後，今年會正式推出透過「智方便+」提交地方選區新登記申請、更改資料同登入「選民資料網上查閱系統」等服務，到時選民可透過「智方便+」提供或者更新電話號碼同電郵地址。

其實政府每年都會舉辦選民登記運動，今年首階段活動喺4月底至6月初舉行，呢段時間會呼籲市民做選民登記、提醒選民更新登記資料同回覆選舉處發出嘅查訊信件；第二階段於8月頭至同月底，其間會提醒選民用「選民資料網上查閱系統」及熱線服務核實登記資料，同埋向被納入取消登記名單嘅選民發信，如果唔回覆就會被取消登記。