【Emily】多人審23條兩邊走 人代閉幕合照唔齊人

【明報專訊】十四屆全國人大二次會議噚日下晝喺北京閉幕，一眾港區人大代表完成任務，可以打道回府。今屆人大會議期間，港府向立法會呈交《基本法》23條立法草案首讀，唔少身兼人代同立法會、行會職務嘅人代，都要香港北京兩邊走。人代梁美芬就話，呢個星期佢總共來回香港飛咗5次，但為咗23條立法，辛苦都係「非常榮幸」。

港區人代團長馬逢國就話，香港代表團今次提咗209條建議，其中兩項得到所有代表聯合署名，可以代表團名義提出，包括提出離境免稅額由5000元調升至3萬元，話咁係方便內地同胞出境，亦同時增加香港旅遊吸引力。

今次兩會提出「新質生產力」發展方向，唔少人代都有回應。人代朱立威話，?家係產業轉型升級嘅關鍵時期，以科技創新為先導嘅高質量做發展戰略，將進一步提升中國經濟嘅動能。佢話會議對香港嘅科技創新能力畀咗高度認可，預期香港將喺國家嘅創新戰略入面扮演更加重要角色。人代楊德斌就提出，以大灣區為起點，喺《粵港澳大灣區（內地、香港）個人信息跨境流動標準合同》嘅基礎上，增加認證機制同負面清單制定，可以吸引國際企業喺香港做跨境數據處理，助力香港建設成為國際數據港。