【Emily】劇團內部分歧 《他席地而坐2.0》撤演

【明報專訊】講述電影《大象席地而坐》已故導演胡波故事嘅紀錄劇場《他席地而坐2.0》，由香港藝術節委約，原定下星期四（21日）起一連4日喺香港文化中心上演。藝術節噚日宣布，日前收到《他席地而坐2.0》主創者告知，話因為無法調和內部分歧，要取消演出。

牽涉情感心理問題 難按原定演出

劇組全體成員嘅聯合聲明講到，最近喺北京最後排練期間，劇組內部嘅藝術方向同創作方式無法達成一致共識，而且有幾位胡波生前嘅好友參與其中，牽涉個人情感、心理健康、尊重逝者等問題，劇組全員認為無辦法喺首演前有效咁搵到處理方式同達成共識，以完成原定嘅創作同演出計劃。

聲明提到，劇組痛苦同遺憾，辜負咗香港藝術節嘅信任同觀眾嘅期待，但佢哋相信，如果勉強呈現一部唔遵從各自內心嘅作品，都無法向藝術節、觀衆、自己同胡波交代，希望大眾諒解呢個決定。

藝術節就話對於演出取消感到遺憾，同埋對觀眾構成不便深感抱歉。藝術節噚日亦已公布咗退票詳情，詳情可到https://www.hk.artsfestival.org/tc/announcement/announcement-2024.html了解。