【Emily】「曾經港青」 政協常委談發迹史 的哥做起

【明報專訊】全國政協十四屆二次會議噚日喺北京人民大會堂舉行閉幕會，全國政協常委譚錦球（圖）接受內媒訪問，講到佢發迹置富嘅經歷，話由做的士司機開始。佢形容自己係「曾經的香港青年」，無錯過內地呢個發展大舞台，話國家發展再一次向香港青年提供發展嘅黃金機遇，中央近年亦推出多項惠港青年措施，希望大家一定要「緊緊地抓住」。

譚錦球話自己喺香港出生，噚日於會議第三場「委員通道」接受記者提問時，話喺1978、1979年同家人到東莞探親時，發現從深圳到東莞要花一個晚上以上，於是佢抓住商機同機遇，利用佢喺商場做售貨員掙到嘅幾千蚊，買咗一輛二手出租車到深圳做出租車司機，當年佢20歲。

譚又話，開車時見到公路兩旁好少餐廳，於是佢喺深圳107公路兩旁開餐廳，將香港美食帶到內地，後來佢又睇到市場需要，開咗農場、商場、工廠等，逐步發展起來，「就這樣一直在內地打拼了30多年」。