【Emily】曾俊華：冇理由有人就跌落山唔大嗌提醒

【明報專訊】前財政司長曾俊華早前喺facebook撰文話憂慮香港需借貸度日，佢噚日再出帖，話醫療、教育同社會保障三大開支，幾乎佔政府整體開支四分之三，認為若完全唔觸碰呢三大開支，同時又無辦法搵到大筆新收入嘅話，「係好難做到收支平衡」，形容呢種「痛的抉擇」係要大家共同承擔。佢話有人覺得問題好快就唔存在，「甚至有人會話：係你悲觀啫！但係我覺得，冇理由見到有人就嚟跌落山，都唔大嗌提醒下（吓）㗎」。

曾俊華話，上星期嘅帖文激起千多個留言，感受到好多朋友仍好愛「呢個家」，亦感受到市民明白「荷包可能就快乾塘」，又唔想政府削減福利嘅矛盾心情。

作為保險公司資深顧問嘅佢又引述政府統計，話現時原來仲有一半人係乜嘢醫療保險都冇，並上載咗一張該保險公司嘅廣告相；佢喺文尾話?家仲有公營醫療做保護網，但若公共資源日後變得較緊張或醫療成本不停升，中年及後生仔到時可能會較辛苦，認為好多嘢要未雨綢繆。