【Emily】前日演練出意外 中區消防局開放日取消

【明報專訊】中區消防局前日發生罕見意外，一個消防員喺高空拯救演練期間由10米高墮地受傷，清醒送院。原本聽日喺上址舉行嘅灣仔區應急防災嘉年華暨中區消防局開放日，消防處噚日喺社交網站宣布取消。

Emily向消防處追問取消原因，處方話正就一宗意外事故展開調查。意外發生後，好多網民都喺處方facebook留言，希望傷者早日康復。消防處透露，傷者左手同左腿受傷，做手術後情况穩定，但仍要留院，據知事件純屬意外，初步排除工具有問題。消防處強調非常關注前線人員嘅行動安全，正調查緊呢單意外。

睇番消防處社交網站，原定嘅開放日會舉行滅火及救援操練示範、模擬火場迷宮、消防局導賞團，仲會有攤位遊戲同豐富禮品。雖然暫時未有重辦開放日嘅確實日期，但消防話如果有進一步消息，會喺消防處網頁同社交媒體等發布。