【Emily】50周年送測試樣本 消委抽獎有篋有煲

【明報專訊】消費者委員會為慶祝50周年，早前宣布下星期六（16日）起一連兩日喺大圍圍方商場舉行親子嘉年華，並會送出以往《選擇》月刊測試嘅產品，唔少人都好奇會送啲乜。消委會噚日就透露獎品清單，大獎係行李篋共13份，總值超過4.2萬元；二獎喺電壓力煲共10份，三獎就有電風筒共11份，其他獎品包括循環扇同爽膚水等共超過70件樣本。

消委會同Emily講，啲獎品都係備用樣本，只係用過嚟影相之類，部分仲係全新未開封，而且都係喺測試入面得分較高嘅產品。會方仲話過往都會送出樣本畀有需要嘅人，全部經過測試，可安心使用。

講番個嘉年華，將會設有5款以消費者權益為主題嘅攤位或棋盤遊戲，入場者成功挑戰遊戲並集齊5個印章，再追蹤消委會社交平台帳號，即可參加抽獎。另外，所有入場者可獲贈消委會金禧版防RFID讀取卡套。