【Emily】火場救7貓 兩消防局獲PETA愛心獎

【明報專訊】葵涌德昌大廈星期日（3號）發生火警，消防員救出戶主同埋7隻貓咪，部分貓吸入濃煙不適，消防員當場提供氧氣同心外壓。動物權利組織「善待動物組織」（PETA）噚日發新聞稿話，為表揚消防愛護動物、重視生命嘅救援行動，分別向葵涌消防局和梨木樹消防局頒發「愛心消防局獎」。

即場供氧同做心外壓

PETA高級副總裁傑森貝克（Jason Baker）話，全賴消防員嘅勇敢善良同靈活變通，貓咪先可以從鬼門關倖存，要向無分物種、對所有受助者一概予以拯救嘅救援人員致敬。不過消防處同Emily講暫未收到相關組織通知。

至於嗰7隻成年唐貓，其中3隻被救出時昏迷，消防即時提供氧氣同心外壓施救；另有兩隻曾從高處墮下，兩貓貓均清醒，其一有骨折；餘下兩隻情况相對穩定。Emily噚日再問愛協貓咪情况，愛協就話，因為貓咪有主人，涉及私隱，所以唔方便透露。