【Emily】飲茅台睇變臉騷 高球明星食盆菜 林健鋒話好受落

【明報專訊】國際高球盛事「LIV Golf 2024 香港站」周五（8號）起一連3日喺粉嶺高球場上演，50幾名世界級球手近日陸續抵港。香港哥爾夫球會前日（5號）就邀請咗美國球手屈臣（Bubba Watson）同西班牙嘅加西亞（Sergio Garcia）等球星一嘗盆菜、飲茅台同觀賞變臉表演，呢兩位大滿貫冠軍仲同在場嘅中國香港高爾夫球協會港隊年輕球員傳授打波技巧同比賽心得。

年輕港將同場 獲授技巧心得

盆菜宴設於屏山鄧氏宗祠，有份出席嘅經民聯立法會議員林健鋒噚日喺社交媒體話，一班球星睇變臉騷時好開心，個個拍手叫好。佢又話圍村、盆菜宴都係本港極具特色同歷史價值嘅傳統文化，希望屈臣同加西亞日後多來港，參與盛事活動同體驗「深度遊」，畀國際知道香港唔止係國際大都會，仲係一個豐富多彩嘅「萬花筒」。

「LIV Golf 2024 香港站」由沙特阿拉伯主權基金支持，香港哥爾夫球會預計會為本港帶嚟數以億元計經濟收益，會長郭永亮話，香港具備豐厚文化底蘊，一直係理想嘅旅遊目的地，希望令一班球手參賽之餘仲可以體驗香港魅力。