【Emily】「母親的抉擇」製動漫風短片 告知懷孕少女「有得揀」

【明報專訊】唔少意外懷孕嘅少女會覺得迷惘無助，但向身邊親朋求助又未必容易開口。為意外懷孕少女提供服務嘅「母親的抉擇」噚日舉行發布會，宣傳最近製作嘅一條日式動漫風格短片，希望向意外懷孕少女傳達信息，話佢哋知面對意外懷孕時，可以有自己嘅選擇。母親的抉擇喺facebook專頁話，香港每年約有5400個少女意外懷孕。

短片長兩分鐘，主角係一個著校服嘅女生，用即時通訊軟件通知男友「我有咗，點算好啊？」想問對方「你喺邊」時，又忐忑刪走，對方最終都無回覆。女生於是好徬徨咁坐喺睡房牀邊，身邊嘅貓貓上前安慰，再帶出信息畀佢知道，意外懷孕都可以有得揀，包括自己撫養小朋友、安排寄養家庭領養，或者選擇終止懷孕，而求助者可以放心搵母親的抉擇傾訴，對話內容保密。

「香港賽馬會社區資助計劃——意外懷孕支援服務」項目由母親的抉擇主辦、賽馬會慈善信託基金捐助，求助者可以打支援熱線或者WhatsApp 5633 5678求助，亦可以追蹤項目嘅Ig專頁「識後空翻嘅貓貓」Backflip_Kitten，獲得相關資訊。