港聞
【Emily】驚蟄「打小人」 要排成個鐘
【明報專訊】噚日係農曆二十四節氣嘅驚蟄，象徵氣溫回暖，唔少人會按民間習俗喺呢日「打小人」。係本地打小人勝地嘅灣仔鵝頸橋底，噚日人流絡繹不絕，一度有過百善信坐喺石壆排隊，部分人要等成個鐘頭先請到「仙姑」幫手打小人！為咗新一年小人遠離自己，同埋祈求好運驅走衰運，大家都唔介意嘥少少時間等吓。
鵝頸橋底噚日下晝有大約10檔「打小人」開檔，各個檔口點起香燭、燃燒紙繪製嘅白老虎「祭白虎」，一眾「小人婆」或「仙姑」落力打打打，口中念念有辭，夾雜有力嘅啪啪聲。有「小人婆」話今年人流同往年差唔多啫，而部分善信就話自己幫襯咗「打小人」幾十年無停過，亦有外國遊客停低睇，話覺得好有趣。現場有幾個警察維持秩序，又拉起橙帶圍住輪候嘅人龍，仲不時用揚聲器叫路人唔好停留同影相。
