【Emily】海園鱷魚5候選名字 fb投票決定

【明報專訊】海洋公園今年初為新成員——舊年喺八鄉蓮花地發現嘅雌性鱷魚搞咗個命名比賽，候選名字最後五強噚日出爐，分別係「保保」、「蓮融」、「希希」、「糖蓮子」同「百香果」，鱷魚女最後叫咩名就靠大家喺園方facebook投票決定喇。

不過，Emily噚日見到每個名背後寓意時就嚇到個心離一離，事關園方話「蓮融」呢個名除咗寓意共融，仲話同音嘅「蓮蓉」係「香港人喜歡的傳統美食」，相信香港人一定鍾意咁話！唔知大家係咪都對「蓮融」嘅寓意有啲猶豫呢？Emily噚日就初步睇過，象徵鱷魚熱情活躍、同八鄉同音嘅「百香果」暫時呼聲最高。

下周二截止 有門票抽獎機會

園方話，年初向公眾收集名字，反應相當熱烈，兩星期內已經收到超過11,000個名，上個月經過全港最大規模學生保育團隊「海洋公園海馬同學會」成員首輪投票後，選出最後五強畀公眾投票，下星期二（12日）中午12點截止。投選咗當選名字嘅市民將有一次抽獎機會，獎品係海洋公園成人門票兩張，名額20個。園方下個禮拜四（14日）會喺facebook公布結果。