【Emily】旅發局真人show 測試旅業服務質素

【明報專訊】為推廣香港全城好客之道，旅發局同HOY TV合作拍攝一連八集嘅真人show，搵咗李尚正（阿正）同盧頌恩（妹頭）主持，呢兩名「臥底」會化身導遊，混入餐飲、零售、交通、酒店住宿等行業，以第一身角度測試香港旅遊業嘅服務質素，令觀眾了解何謂優質服務精神。

節目逢星期日晚9點喺HOY TV（免費電視77台）播出，第一集前日（3日）出街，製作組噚日就去咗有單車界老字號、由港隊前單車代表黃金寶主理嘅「同榮單車」拍攝，優質旅遊服務協會主席黃傑龍仲去咗探班。黃傑龍認為，節目將優質服務嘅精神「帶入屋」，佢希望透過節目令社會討論焦點重回優質商戶，令更多人知道香港都有好多用心做好服務嘅商家同員工。

優質服務係乜？黃金寶就認為，舖頭唔係單靠商品種類多同質素，店員要掌握專業產品知識同有豐富經驗，仔細聆聽顧客需要等，先可以提供到獨一無二嘅優質服務，就好似其舖頭會引入精密儀器，提供客製化服務，仲有埋咖啡吧方便單車友聚腳。