【Emily】源禾出發活力跑 5000人鬥「扮」唔鬥快

【明報專訊】第九屆全港運動會噚日喺沙田城門河舉行「賽馬會全城躍動活力跑」，有超過5000個市民參加，活動目的係鼓勵市民多做運動，喺社區層面推廣「普及體育」、着重自我挑戰，所以活動不設競賽。唔少市民喺跑道一帶為跑手打氣，大會仲喺源禾遊樂場舉辦嘉年華畀巿民參與，除咗舞台表演、新興運動攤位遊戲，仲有結合多媒體同虛擬實境元素嘅體育互動遊戲區同拍照區等。

今次活力跑分為3公里同10公里兩個組別，同樣由源禾路近源禾遊樂場起跑，參加者會獲贈紀念T恤同禮物，喺限定時間跑晒全程，仲會獲贈電子證書同紀念獎牌。大會亦設個人「最出位扮相大獎」同「全場最佳團隊服裝獎」，唔少參加者悉心打扮（圖），令現場增添歡樂氣氛。