【Emily】工程師周嘉年華開鑼 深井小學生打造鵝船

【明報專訊】香港工程師周嘉年華噚日起一連3日喺西九文化區海濱草坪舉行。發展局長甯漢豪主持開幕禮後就同其他嘉賓行咗幾圈，其間來自深井天主教小學嘅幾個同學仔向佢展示一隻用環保物料製作嘅小船，聲稱浮力足以一次過裝到6罐汽水。

有份創作嘅黃同學話船身用咗藍色代表海洋，黃色代表光明，象徵海洋上嘅一束光。同學仔多次強調呢隻外形似足黃鴨嘅船仔其實係鵝嚟，因為深井出名食燒鵝，?到局長同一眾嘉賓哈哈笑。

嘉年華現場有超過40個來自工程師學會分部及唔同公司嘅攤位，Emily噚日去咗土木分部嘅攤位試玩高空工作VR遊戲，其中一個任務係要著齊安全帽同雙尾繩等5個裝備，安全咁行去棚架終點。Emily首次試玩就「高處墮下」，事關漏咗扣安全帶，在場人員即刻提醒喺工地做嘢要做足安全措施，「做漏真係會出事」。