【Emily】宣布加煙稅後24小時 戒煙熱線來電飈8倍

【明報專訊】新一份《財政預算案》即時加煙稅，每支煙稅加8毫，一包20支零售賣約93元。衛生防護中心噚日喺facebook話，新措施令衛生署戒煙熱線來電飈升，喺宣布加煙稅後嘅24小時內收到149個來電，比前兩個月每日平均16.8個升咗近8倍，反映加煙稅係戒煙嘅最有效方法。

政府已經連續第二年加煙稅，今次加約31%，同舊年相若，每包煙平均加價至約93元，煙稅佔約七成，但仍落後於世衛建議嘅75%水平。衛生防護中心話戒煙唔止可以慳錢，更重要嘅係可以令人重拾健康，呼籲市民打去戒煙熱線1833 183。