【Emily】警方網安特別小組成立 「對接」業內9資深機構

【明報專訊】近年網絡安全事故頻生，其中數碼港及消委會去年先後遭黑客入侵。警方噚日舉行「網絡安全特別行動小組」成立儀式，小組將由警務處牽頭，同9間嚟自海內外網絡安全行業嘅資深機構合作，透過網絡情報互換同專業知識分享，提升未來應對網絡威脅嘅能力。

警方網罪科噚日同場舉辦「網絡安全精英嘉許計劃」頒獎典禮，活動由政府電腦保安事故協調中心同香港電腦保安事故協調中心協辦，表揚52名得獎者同機構喺網絡安全嘅成就。頒獎典禮自2016年舉辦，旨在鼓勵網絡安全從業員提升專業水平，鼓勵以科技預防網絡攻擊同提高網絡安全水平。

主禮嘉賓警務處長蕭澤頤話，隨住港府推動創科發展，網絡保安事故及科技罪案不斷增加，社會需要更多人才維護網絡安全。佢認為計劃除咗表揚各行各業從事網絡安全嘅專業人士外，亦提供互相交流同分享寶貴經驗嘅平台。