【Emily】建造業公司 近七成仲未有網頁社媒

【明報專訊】政府統計處噚日出版《2023年資訊科技在工商業的使用情况和普及程度統計調查報告》，結果顯示，資訊及通訊業具有「網絡存在」嘅比例，即設有網站／網頁或顯示喺另一個實體網站，喺7個主要行業組別內最高，有84.1%；最低嘅就係只有31.1%嘅建造業。對比上一份調查報告，前者少咗0.1個百分點，後者則多6.6個百分點。

調查喺上年3至12月進行，訪問咗35.1萬間機構。結果顯示，7個主要行業組別都有逾96%受訪機構有使用電腦及／或智能手機作業務用途，當中資訊及通訊業、金融及保險、地產、專業及商用服務業、社會及個人服務業嘅使用比例係100%。而若以機構規模劃分，具有網絡存在嘅大型、中型、小型機構嘅比例，分別係93.8%、80.3%及44.3%，較上一份嘅調查報告多2.2個、1個同5.2個百分點。

政府統計處話，調查報告旨在蒐集有關資訊科技喺工商業嘅使用情况同普及程度嘅資料，為香港資訊科技服務發展提供有用嘅參考。