【Emily】「跛腳」逾5月 石澳道全線通車

【明報專訊】舊年9月嘅世紀暴雨，港島近爛泥灣一段石澳道因山泥傾瀉路陷，當局需封路搶修，多月嚟只開單線雙程行車。路政署噚日話，經公共巴士試路後，路段喺噚日下晝約5點全面恢復兩線行車。對於路段封閉逾5個月，大浪灣村民黃小姐噚日同Emily講，「開番咪好囉！」但質疑整得太耐，話好多時都見唔到維修人員做嘢，仲話啲交通燈成日壞?！

市民投訴常壞燈 路署話排水強咗

黃小姐話，雖然路段封閉超過5個月，但實際對佢影響唔大，只係較封閉前需要預早少少出門口！問佢擔唔擔心再遇世紀暴雨時石澳道又再封閉，佢話都有啲擔心，希望當局做好排水，唔好「得過且過」。

路政署噚日話，已經完成為重開另一條行車線必需嘅緊急斜坡鞏固工程，包括安裝31支約9至12米長嘅迷你樁柱，並喺樁柱上設置混凝土冠樑。路政署亦完成咗嗰段路嘅渠務改善工程，包括增設排水溝、為鄰近集水坑做優化工程同清渠，進一步提升咗路段喺惡劣天氣下嘅排水能力，加強行車道安全。