【Emily】經民聯識搶鏡 道具刀「切辣」賀爭取成功

【明報專訊】財政預算案噚日發表後，多個政黨召開記者會回應措施，其中曾多次促請「撤辣」嘅經民聯識搶鏡，準備咗毛公仔刀同一大串辣椒道具「切辣」慶祝。主席盧偉國及黨友林健鋒、梁美芬、劉業強、陳祖恒、陸瀚民、龍漢標及吳永嘉共8人，一埋座位就每人攞把「刀」表演「切辣椒」，象徵樓市撤辣，其間仲有人大叫「全部都要切㗎，全面撤辣呀，切晒佢！」

唔少政黨及團體早前都有提撤辣。盧偉國話，全面撤辣係由經民聯率先提出嘅建議，好歡迎財爺採納，相信有助樓市恢復信心，止跌回穩。佢亦講到，今份預算案採納咗經民聯提出嘅超過60個建議，包括全面取消樓市辣招、撥款10.9億元推動旅遊業發展措施及活動、向電影發展基金注資14億元等，並以「因時制宜，全面撤辣，務實部署，提振信心」16個字大讚。