【Emily】廠商會下月去澳門搞工展會

【明報專訊】香港中華廠商聯合會噚日搞傳媒午宴，會長盧金榮話今年至少會舉辦5個展會，「頭炮」係下月喺澳門舉辦嘅香港工展會（澳門），又話自去年通關，廠商會已經組織十幾個內地、多個東盟國家嘅考察訪問團，介紹香港最新發展同招商引資，未來3年會繼續加強同國際嘅經貿聯繫，到訪更多有潛力嘅市場，包括中東及南美等，透過多元市場「對冲」歐美貿易主義升溫嘅影響。

盧金榮話今屆廠商會嘅工作重點係加強推動香港工業邁向高增值、智能化、綠色化、品牌化，舉例廠商會嘅CMA檢定中心正協助傳統企業利用科技邁向高增值發展，又強調最重視內地市場，會一直循唔同途徑為業界爭取有利於喺內地營商同發展嘅政策。

參加午宴嘅副會長黃家和就話，聽聞有人形容佢係「傳媒之友」，佢話自己樂於分享意見。被問到點睇政府打算每月都喺維港舉行煙火匯演，佢覺得「個個月都搞」就唔多夠新鮮感，未必可以吸引到好多內地旅客。