【Emily】吳傑莊擬兩會提案跨境防騙 讚好內地「詐騙保險」

【明報專訊】全國人大及政協兩會下星期喺北京召開，港區全國政協兼選委界立法會議員吳傑莊（Johnny，圖）準備咗4個提案，包括推進跨境電訊詐騙協同治理機制。舊年成立「反詐騙大聯盟」嘅Johnny噚日同傳媒茶敘，佢話?家內地有「詐騙保險」，暫時有幾萬宗投保，受保人買保險前要先填一份問卷，俗稱「身體檢查」，作為第一層保護，確保受保人對詐騙有一定認知，日後萬一被騙，報案確認後可獲部分賠償。

Johnny承認詐騙保險唔可能完全杜絕騙案，但「救得幾多得幾多」，希望透過問卷加深市民對騙案嘅認識，佢亦希望日後透過大聯盟，畀本港市民試做內地投保嘅問卷。

另外3個提案分別係喺大灣區建設國際中小企業創新Web3融資平台、配合國家發展推動香港航天科技、打造中醫藥文體旅品牌同服務。Johnny提出容許獲內地認證嘅「專精特新（專業、精細、特色、新穎）中小企」來港發行虛擬貨幣，又希望推動航天科技發展，建設相關教育同旅遊點，舉例可向內地爭取將用過嘅航天物品喺香港展覽。