【Emily】昂坪360新春「旺丁旺財」 買多10部全景纜車

【明報專訊】本地旅遊景點或設施陸續公布舊年嘅成績表，昂坪360噚日話舊年總共接待咗138萬名訪客，比前年多約2.5倍，整體客量恢復到疫前2019年嘅大約95%。董事總經理劉偉明形容今個農曆新年「旺丁旺財」，初一至初八訪客人數比舊年升26%，人均消費額就升29%，亦較疫情前多27%。公司喺舊年11月調整過票價，佢話今年未有打算再調整，「唔會見好就做（調整）」，?家集中「做好口碑」咁話。

西安同青島下月起納入赴港澳自由行城市，劉偉明話歡迎，但認為兩市旅客未必認識本港旅遊，故要製作多啲「攻略」推廣。政府預計今年推出《香港旅遊業發展藍圖2.0》，佢話公司有定期舉辦文化深度遊，例如360大嶼山文化探索深度遊等，?家審視緊需求重新包裝項目。佢話大嶼山有豐富嘅天然資源，但受限於交通配套同承載力，故要完整規劃，公司期望參與其中。

前年12月推出嘅全景纜車「Crystal+」喺年初一至初四使用率達100%，公司話因應需求已增購10部，估計第四季陸續運到，喺安全測試同通過相關部門審批後，期望喺12月投入運作。