【Emily】維基創辦人物理學家到港參加峰會 旅發局邀科技猛人坐帆船遊維港

【明報專訊】由今年起連續3年落戶香港嘅「亞洲科技變革峰會」噚日同今日舉行，嘉賓講者包括維基百科創辦人Jimmy Wales、國際知名物理學家加來道雄。旅發局前日盡地主之誼，邀請佢哋坐傳統中式帆船「張保仔號」，邊品酒、邊欣賞維港兩岸景色。

再度訪港嘅加來道雄夫婦話好享受維港遊，可以了解香港繁盛轉變，又話香港有唔少旅遊活動，未來會邀請朋友一齊嚟添。佢哋喺峰會後亦會繼續留港旅遊，旅發局特登安排咗佢哋去睇賽馬、體驗森林浴、參觀西九文化區同埋M+等。

Jimmy Wales話香港交通好方便，係亞洲一個好好嘅商務往來同旅遊城市，喺維港上欣賞亮起嘅城市燈光及建築感覺好酷，傳統帆船同現代香港相映成趣，形容係一趟好好嘅文化體驗，仲話有意出年帶埋屋企人嚟，期待到山頂遊覽。