【Emily】追航空劇 蘇澤光失望「自己」僅出鏡兩秒

【明報專訊】繼《衝上雲霄》後，無綫上月另一齣以航空業為題材嘅劇集《飛常日誌》喺業內引起討論，機管局噚晚舉行春節酒會，主席蘇澤光以英文致辭時自爆有追劇；又話知道自己主席一角由陳豪（客串）飾演後，好興奮期待，諗住有機會出名，點知套劇播完，形容最後「自己」只出鏡兩秒。蘇澤光話有啲失望，不過事後諗通咗原因，笑言一嚟主席呢個位無搞辦公室戀情，太悶，二嚟要請陳豪出鏡要畀好多錢，但自己只係攞緊最低工資。

機管局近日接連發行港元債券同俗稱「三跑債」嘅零售債券，蘇澤光話，兩項債券嘅成功顯示國際同本港社會對機場同香港繼續充滿信心；又話三跑等都係局方自行從金融市場搵資金，無向政府申請撥款，建議政府大型基建可考慮。最後佢祝大家新年好運同身體健康作結。