【Emily】「香港玩完論」發酵 羅奇葉劉續隔空交鋒

【明報專訊】大摩前高層羅奇（Stephen Roach）日前喺《金融時報》撰文提及「香港玩完論」震動政商界，並掀起行會召集人葉劉淑儀喺社交網站X同羅奇隔空交鋒，話佢「唔認識香港」。事緣葉太投書《金融時報》反駁羅奇時一度講錯羅奇幾年無嚟香港，歸咎香港股市表現係因為美聯儲加息等政策所致；羅奇喺X澄清佢舊年來港3次後，葉太就留言話佢雖然嚟過，但仍然唔明香港股市起伏嘅因果。

羅奇於是又回應葉太，話將香港股市低迷歸咎美聯儲決策係荒謬，「香港嘅問題係自己同北京一手做成」。此言激起葉太再留言反駁羅奇，話「雖然你2023年嚟咗香港三次，但你唔認識香港，或者太驕傲唔肯認錯」。葉太引述2019年數據，話香港當時集資數字全球第一，2020年都有154間公司喺香港上市。

羅奇另外喺網誌話，舊年嚟香港後，發現唔少朋友自2019年政治動盪後離開香港，就算有啲公司留低，都有制定備案，員工要分散唔同地方。佢觀察社會上潛在對香港未來嘅焦慮，唔似昔日咁有能量同樂觀。