【Emily】私隱署：用AI蒐資料機構 冇發現違私隱例

【明報專訊】人工智能（AI）應用愈嚟愈漸普，機構喺開發同使用AI系統時可能涉及收集同處理個人資料。私隱專員公署喺舊年8月至今年2月期間同28間機構做循規審查，當中有10間透過AI產品或服務收集個人資料，過程中冇發現違反《私隱條例》。私隱專員鍾麗玲就建議，所有開發或使用AI嘅機構，喺收集或處理個人資料時，要採取措施確保遵從條例、就開發或使用AI做全面嘅風險評估等。

審查28企 8有做私隱評估

受查機構包括電訊、金融及保險、美容、零售、運輸、教育同政府部門，有21間喺日常營運時有使用AI。喺10間有透過AI收集個人資料嘅機構中，全部都有向資料當事人提供收集個人資料聲明、採取保安措施，其中8間機構使用AI產品及服務前有做私隱影響評估。

私隱署嘅審查亦顯示，有9間機構會保留收集所得個人資料，其中8間有訂明個人資料嘅保留期限，仲會喺達至原本收集目的後，刪除相關個人資料或將資料匿名化。剩低一間機構就允許資料當事人自行刪除資料。