【Emily】林志偉：23條係龍年首份大禮 批有言論指公務員薪酬增財困

【明報專訊】警察隊員佐級協會噚日（21日）搞新春團拜，《基本法》23條現正諮詢，協會主席林志偉形容係本港龍年收到嘅首份大禮。佢話，近年唔少聲音喺公務員薪俸檢討時「說三道四、意有所指」，暗指公務員薪酬同服務條件係構成政府沉重財政壓力嘅元兇，刻意令社會對薪酬調整產生負面嘅睇法，對此感到「嗤之以鼻」。

現時警隊紀律人員編制33,259名、文職4733名，係最大部門，但林話警員人手仍不足，喺「十個煲六、七個蓋」下，工作量卻層層遞加，前線仍咬緊牙關盡力做。

話警隊仍缺人「十個煲六七個蓋」

林志偉認為，警員嘅薪酬係根據六大因素、以科學化方法釐定，喺未有其他可行機制下要尊重現有機制。佢預期23條立法後，警隊同其他紀律部隊會面對更多新增工作同挑戰，政府對警員嘅妥善回應，將加強佢哋協助政府成功落實有關工作嘅信心。

團拜出席者包括保安局長鄧炳強及全國政協副主席梁振英等。警務處長蕭澤頤話，國安係市民福祉同經濟發展最佳保障，警隊會全力支持同配合立法工作。