【Emily】陳仲尼扮財神「切辣」 冀預算案撤辣

【明報專訊】《財政預算案》下周三（28日）公布，多個政黨要求財政司長陳茂波全面「撤辣」取消樓市辣招，民建聯立法會議員陳仲尼噚日就趁午飯時間著上財神裝束，喺金鐘海富中心連接政府總部嘅行人天橋向市民派「利是」之餘，帶埋道具大刀同辣椒，即場「切辣」，寓意希望「財爺」能夠盡快撤銷辣招，樓市可復常至2010年前水平。

陳仲尼提到，近期樓市轉弱影響到投資同消費，繼而導致經濟衰退，佢認為政府應該放寬對樓市嘅管制，全面撤銷遏抑樓市需求嘅措施，包括撤銷買家印花稅（BSD）及額外印花稅（SSD），以刺激經濟復蘇。佢又話，撤辣後先唔好諗樓市會有幾多增長，重要係先畀市民恢復信心。佢提倡喺樓市成交量低迷之下，政府要推出「托底」措施，而唔應該喺跌市時繼續用辣招壓住樓市。