【Emily】民建聯調查：62%撐港人加入解放軍

【明報專訊】民建聯上月做咗個「市民認識國家發展」嘅電話民意調查，訪問咗697人，結果發現73%受訪者支持增加認識解放軍，同埋62%支持港人加入解放軍。民建聯話，民調結果顯示港人對解放軍保家衛國、維護國家主權同安全嘅重視，建議政府應該同民間團體、解放軍駐港部隊合辦更多青年軍旅訓練等活動。

至於會唔會喺嚟緊嘅兩會提出容許港人加入解放軍嘅建議，身兼港區全國人大代表嘅立法會議員陳勇話，喺一國兩制下，港人要加入解放軍唔容易，要從長計議，又認為年輕人可以做好多嘢報效國家。

民建聯嘅調查亦發現，73%受訪者贊成提供更多青年軍旅訓練；亦分別65%受訪者贊成政府增撥資源，鼓勵本地電視台製作更多認識國情嘅節目，同埋開發「紅色旅遊線」。該黨立法會議員林琳認為，宣傳香港喺國家歷史所扮演嘅角色，可以令更多市民了解歷史真相、激發愛國情懷等，建議推出紅色旅遊路線同埋整合抗戰遺蹟。