【Emily】生員蒙眼試6款口味 城大賣自家製雪糕

【明報專訊】城市大學喺大埔林村嘅農場再誕新產品，繼上年5月推出「城大牛奶」後，噚日就迎嚟由城大牛奶製成嘅「城大雪糕」。城大噚日趁情人節舉行發布會，話想為呢個特別日子增添甜蜜氣氛。

城大雪糕系列共有6款特色口味，分別係牛奶、芝麻、焙茶、柚子同朱古力共5款常規口味，及1款輪換口味，現時由士多啤梨味打頭陣。發布會上設蒙眼試食活動，畀教職員同學生逐款試食。城大賽馬會動物醫學及生命科學院院長Vanessa Barrs話，好開心見到農場嘅資源成功轉化做美味嘅雪糕，並增進學生對食品生產同安全嘅認識。

城大雪糕同城大牛奶一樣，都係城大農場副產品。農場自2022年11月啟用，為城大獸醫學學士課程學生提供學習機會，例如獸醫檢查、動物福利及飼養、農場管理、食品生產同安全等。