【Emily】范鴻齡高拔陞初三醫院探前線

【明報專訊】農曆新年長假期撞正天氣轉冷，公立醫院嚴陣以待應對服務高峰期。醫管局主席范鴻齡同行政總裁高拔陞噚日大年初三「赤口」唔拜年，親自去咗仁濟醫院同威爾斯親王醫院探望前線同事，多謝佢哋喺新春假期堅守崗位。

范鴻齡同高拔陞噚日去咗仁濟醫院同威院急症室同內科病房，亦去咗仁濟醫院內視鏡中心，了解新春假期服務需求、醫院運作同人手安排。醫管局預計長假期後求診人數會增加，希望市民體諒，又提醒非緊急病人避免去急症室，盡量向普通科門診、中醫診所、私家醫生同私家醫院門診求診。

醫管局今年新春假期實施咗特別措施，急症室求診病人喺年三十至年初九（18日）如果等得太耐都見唔到醫生，可以喺登記後24小時內退番180元收費，轉向其他門診或家庭醫生求診。急症室亦增加咗支援人手，包括加強老人科協作照顧求診長者、加開臨時病牀等，年初一至初四亦有18間普通科門診診所提供服務。