【Emily】任職21年 迎80大壽 盼讓位新人 肥彭將退任牛津校監

【明報專訊】「末代港督」彭定康（肥彭）宣布退休，喺今個學年（2023/24年度）結束後，退任牛津大學校監一職。做咗校監21年嘅彭定康喺畀校長Irene Tracey嘅信提到，自己5月將踏入80歲，希望未來仲有很多生日，但似乎唔會再有另一個21年續任大學校監。

彭定康自2003年起擔任牛津大學校監，其間有5個校長，佢認為退任對自己、對大學都有好處，好讓大學有機會規劃明智嘅繼任計劃，以符合2020年代嘅需求。

佢認為，作為校監無可避免會將自己經驗、睇法帶到工作，所以合理嘅做法，係由一個以全新視角與不同觀點嘅新人擔任校監工作，畢竟大學現在面對嘅主要問題，同佢上任時已不盡相同。

話校監首務撐校長

彭定康又提到作為校監應扮演嘅角色，佢話今時今日校監唔止係代表學校主持儀式，而當初佢接任時，亦意識到其角色遠超於此，話校監首要角色係花最大氣力、時間去支持校長工作。

回顧過去21年，彭定康話除咗較小型嘅會議、晚宴外，佢每年代表大學出席嘅活動有60個，演講、見校友、籌款等，走遍美加、澳紐、星馬、印度、中國大陸、香港、南非及多個歐盟國家。本身係牛津畢業生嘅彭定康亦形容，牛津係佢生命非常重要嘅一部分。