【Emily】漁護署長否認三寶樹濕地公園「縮水」

【明報專訊】政府完成新田科技城環評報告，稍後會向環諮會闖關，對於該項目需要填平89公頃漁塘，令當地擬建嘅三寶樹濕地公園面積由520公頃縮減至338公頃，漁護署長梁肇輝噚日同傳媒敘餐時否認濕地公園「縮水」，佢話最初規劃北部都會區濕地保育公園時，只係粗略勾勒出公園範圍，到研究階段撇除周邊現有補償濕地同新田科技城項目等土地，得出公園擬建面積為338公頃。

魚塘長遠「保育＋養魚」 政府資助　

對於三寶樹濕地保育公園要到2026/27年先動工，2031年完成首期工程，梁肇輝話部分魚塘可以提早推行保育計劃，例如由環團與漁民合作，以現時管理協議模式，改善魚塘生境；至於長遠運作，就會以保育加養魚方式操作，漁民除咗養魚，亦擔當保育區管理者角色，魚塘部分魚要預留部分漁獲，供候鳥食用，政府就會向漁民提供資助，政府亦會協助漁民將魚獲「品牌化」，提升產品價值。梁肇輝又話，新田一帶嘅濕地面積將來會減少，但當局會透過建立三寶樹濕地公園，喺功能上補償損失咗嘅濕地，達到濕地無淨損失嘅原則，認為技術上可以做到。