【Emily】電容器壞不宜維修 九巴棄8國產電巴

【明報專訊】政府2015年撥款1.8億資助巴士公司買咗36架國產單層電動巴士試驗兩年，有說九巴當年獲撥款3120萬，買咗8架由中國青年汽車集團製造嘅單層超級電容巴士同埋興建充電站，2017年起試驗。不過，九巴前日招標請人拆毁或出口呢8架電巴，引起網民討論。睇番資料，當年呢款電巴測試表現差，續航力得19公里，加上製造商喺2019年執埋笠，無咗原廠維修，2021年起已陸續停牌停運。

3000幾萬公帑買嘅巴士，用唔夠5年就玩完，Emily問環保署，署方話現時呢8架巴士嘅超級電容器已經壞咗，九巴喺考慮安全同經濟效益後，確定唔再適合維修使用，所以需要按資助協議公開拍賣，所有收益扣除成本後要全數畀番政府。

環保署又話，當年測試結果顯示，超級電容巴士可以行駛嘅里程短，而且要頻密充電，充電設施又佔用好多空間，技術唔適合喺本港應用。當年九巴只喺兩條短途線，包括沙田嘅284同啟德5M線試驗。不過，有說呢8架電巴，其中一架出咗牌後一直閒置，即未用過就要棄置。