【Emily】《港青在邊城》系列細攝新疆 首播會12國領事出席

【明報專訊】全國政協副主席梁振英（CY）近年頻頻推動新疆發展，佢支持創立嘅香港齊心基金會，最近都拍咗一套名為《港青在邊城》嘅視頻系列。噚日個系列舉行首播酒會，就由CY親自主持，有近100名駐港總領事、外國同本地商會領袖等政商界人士出席，當中出席嘅駐港領事有12個國家咁多，連聯合國經濟及社會理事會代表都有出席。

呢套微紀錄片由齊心基金會執行董事張瑞蓮做總監製，佢帶領製作團隊先後兩次到新疆，用咗3個禮拜，深入新疆喀什、阿克蘇、伊犁、賽里木湖、霍爾果斯等地，拍攝當地歷史文化同最新發展。埃及駐港澳總領事巴赫爾．舍維西（Baher Sheweikhi）睇完首播後，就話個節目可以幫外界了解新疆，又話新疆多樣性好吸引佢，令佢好想到新疆一趟。