【Emily】用內地潮語「真NB」「YYDS」 宣傳新春通宵線 城巴海報喊「牛逼」

【明報專訊】深圳灣口岸將於大年三十到大年初四24小時開放，城巴噚日公布，由深圳灣口岸往返屯門碼頭嘅日間巴士路線「B3」，新春期間會開通宵線「NB3」，由年初一至初五（10至14日）運作。可能因為路線同內地有關，城巴新聞稿宣傳海報用咗內地網絡潮語，「真NB！（真牛逼，即好厲害）」、「城巴就是YYDS（永遠的神）」，引起網民討論，有人留言話既然城巴鍾意引用內地拼音，「幾時可以正名為Chengba？擔心啲同胞睇唔明Citybus」。

「NB3」初一至初五運作

NB3線車費21.5元，由屯門市廣場出發嘅頭班車於2月9日至13日嘅晚上11時40分開出，每晚有4班，約每小時1班，最後一班為翌晨2時10分。屯門碼頭開出嘅頭班車則於2月10日至14日凌晨零時20分開出，每小時1班，最後一班為5時20分。深圳灣口岸開往屯門市廣場嘅頭班車為2月10日至14日凌晨零時40分，每小時1班、共3班；往屯門碼頭嘅班次凌晨1時10分至6時10分每小時開出。

另城巴年三十至年初二（11日）期間會開976S往返銅鑼灣、中環同落馬洲新田，方便市民經皇崗口岸過關，詳情稍後公布。