【Emily】或上門探多病假員工 城巴被指組射波關愛隊

【明報專訊】有時打工仔請病假「射波」，老闆明知係員工偷懶，但又好難唔批病假，不過城巴就似乎已經諗到計仔反擊。近日網上流傳一張城巴上星期六發出嘅員工通告，提到隨着城巴去年底開始用電子假期申請表，公司會對出勤情况異常嘅員工作出「適切跟進」，包括登門探訪，「以進一步了解及關心同事，並希望在適當時提供所需的支援」。有網民笑言城巴似乎想組織「射波關愛隊」，又引述員工話希望嚟探病嘅同事可以帶埋曲奇或能量飲品表心意。

Emily噚日同城巴職工會理事長林乃華傾過，佢確認張通告係真嘅，又話城巴現任高級管理層好緊張病假率，之前都已經有主任打電話關懷請病假嘅員工，今次仲指會登門探訪，唔少同事聽到後得啖笑，但就聽聞真係有同事已被上門「關愛」。Emily問過城巴點睇網民形容佢哋搞「射波關愛隊」，截稿前無回應。