【Emily】徵新稅否 田北辰話民意分歧

【明報專訊】Emily日前寫過，實政圓桌立法會議員田北辰早前用手機SMS方式做民調，問市民支唔支持政府開徵新稅，叫人按鍵回覆，被以為係電騙信息；田二少噚日話，佢傳咗4萬個短訊，接收者係以前參與過活動嘅市民，最終都有696人有按鍵回應，話45%者反對徵新稅，亦有55%嘅人話可以研究引入唔同稅種。田二少話意見幾分歧，各佔一半，佢都未有既定想法，形容加唔加稅要考財爺政治智慧。

田北辰話，SMS民調只係諗住做內部參考，話政府有財赤，佢想知道街坊對是否開新稅種嘅意見，近一半回覆者話唔同意徵新稅，另一半同意嘅人中，佔最多人話支持物業資產增值稅，有165人支持。田二少話，無論政府開徵邊一種稅都會有人受影響及反對，提出如果要擴闊稅基，應全盤研究，大家分擔，避免只偏種某一稅種。