【Emily】國產Q-Train港島線啓航 鐵路迷興奮拍照

【明報專訊】港鐵採用嘅內地青島四方製列車（Q-Train），噚日（28號）起正式喺港島線投入服務，首架新列車喺朝早9點47分由柴灣站開出，前往堅尼地城站方向，運作大致暢順，柴灣站有過百個鐵路迷等候同上車影相。鐵迷最興奮，有人清晨已去到車站等首班車，當佢哋見到新車駛入月台時都爭相影相、做網上直播等。

港鐵話，新列車喺設施設計上有好多提升，包括更寬闊嘅車廂空間、更多扶手裝置、座椅設計符合人體工學同埋有背靠、車內有動態路線圖顯示、車廂全面採用LED照明，並配備「智能伺服器」，可實時遙距監察列車狀况，有助大數據分析，加強列車預防性嘅維修。

港鐵喺2015年用60億元買咗93架新車，並於前年11月底引入觀塘線，用嚟取代英國製嘅市區線第一代列車（M-Train）。