【Emily】機場櫻花園今開放 新品種好運來迎客

【明報專訊】機管局舊年起喺機場島開設櫻花園，開放畀市民賞櫻，今年花季將至，局方噚日公布櫻花園會今日起開放，而今年局方種咗一款更適合香港天氣嘅櫻花新品種「好運來」，顏色較往年嘅「廣州櫻」更鮮艷更紅，花蕾亦較紮實。

局方提到，園內85棵櫻花樹有三分之一已盛開，園內泛起一片粉紅櫻花海，預計花期持續7至14日，下周末會開得最燦爛，歡迎大家去打卡。

花期料最多兩周 下周末最燦爛

櫻花園位於機場赤鱲角南路觀景山山腳，機管局機場運行執行總監姚兆聰話，櫻花園往年種植約100棵廣州櫻，今年同廣州一間大型櫻花培植集團合作，種咗85棵「好運來」，而該品種更耐熱，更適合香港天氣。

姚兆聰話今年花期特別難估計，原本估計花期喺過年後，但早前天氣較暖，花期早咗，預計下周末係賞櫻黃金期。由於櫻花園距離港鐵東涌站唔遠，往年好多人喺東涌行過去，局方今年會加派人手維持秩序，因應人流實施人潮管制同臨時交通管理措施，提醒現場不設私家車位，大家唔好揸車去喇！

除咗室外櫻花園，機管局喺元宵節期間亦會喺機場一號客運大樓抵港大堂擺放室內「好運來」櫻花擺設，畀市民喺室內都可以賞櫻。