【明報專訊】立法會噚日舉行惜食體驗日，一眾議員、議員助理、立法會秘書處職員等250人，喺午飯時間一齊食由惜食堂提供嘅飯盒。惜食堂將剩餘食物收集煮成熱飯餐，推廣惜食文化。立法會主席梁君彥話，香港每日棄置嘅廚餘有成3000公噸，佔都市固體廢物近三成，係最大嘅廢物種類，而廚餘唔減，減廢工作會舉步維艱，因此支持從源頭減廢，推動廚餘回收。
惜食堂為議員準備咗幾款熱食，有冬菇魚肚蒸雞、素食等，議員都食得津津有味。梁君彥話，立法會多年來舉辦嘅宴會或活動，事後都會將剩餘嘅食物捐畀慈善機構，佢亦指示秘書處盡快買智能廚餘回收機，同時已經簽署惜食約章，承諾減少廚餘，推動「惜食立法會」。
