【Emily】憶2003年已服務立會 馬逢國稱唯一仍在席 張宇人話唔係

【明報專訊】立法會噚日舉行特首互動交流答問會，23條立法係焦點。選委界馬逢國發言時「話當年」，自言「當年（2003年）50位委員（法案委員會），（我係）唯一今日仍然喺立法會服務嘅議員」，又話「見證同參與基本法23條完成立法，一直係我20幾年作為立法者未完成嘅心願」。

張宇人發言時就回應，「2003年張宇人都坐喺度，佢（馬逢國）唔係唯一一個，我係第二個」。Emily翻查資料，張宇人當年係立法會議員，但無加入法案委員會。張宇人會後話自己已預備時間審議23條，「我自己事務委員會主席又無做，其他立法嘅議案都無參與，就係預咗時間全力支持23條立法」。

時任保安局長、當年主理23條立法嘅葉劉淑儀就話，「22年前我坐喺對面（官員席），好高興今次作為議員，有機會完成呢個未完成嘅責任」。

特首未進廳林素蔚已撳掣 終未能發問

每次立法會答問會，議員都要鬥快撳掣爭取發言機會，Emily噚日見到林素蔚未待特首進入會議廳、仍然站立時，已經俯身不斷撳掣，當時立法會主席梁君彥亦未請議員撳掣提問。不過，林素蔚最終都無機會向特首發問。