【Emily】葉劉叫政府邀Beyoncé來港開騷 楊潤雄稱由市場決定 被批答覆「官僚」

【明報專訊】新民黨主席葉劉淑儀噚日喺立法會提出口頭質詢，關注當局如何吸引國際級歌手來港舉辦演唱會。佢指美國歌星Taylor Swift選擇喺新加坡搞演唱會，本港錯失機會，「政府會唔會積極爭取類似嘅頂級藝人？例如Beyoncé？或者內地嘅『頂流』？」文體旅局長楊潤雄就話交由市場決定，「好難政府主動話一定要攞到邊個過嚟，先叫做成功定失敗」。

今屆政府積極發展盛事經濟，楊潤雄噚日回應葉太嘅口頭質詢，指演唱會是否在港舉辦「屬商業決定，由市場主導」，政府鮮有提供資助，重申政府一直提供相應協助與便利措施。

准演唱會申文藝基金？ 楊：視乎個案

葉太批評楊潤雄嘅答覆「非常官僚」，提到Taylor Swift喺美國舉辦66場演唱會收益約10億美金，其演唱會亞洲站落戶新加坡。楊潤雄回應稱政府唔會以邊個歌手來港衡量是否成功，「個別邊個嚟、邊個唔嚟，交番畀市場決定」。至於會否放寬文化藝術盛事基金嘅申請資格至演唱會，楊潤雄話會按個案考慮。

民建聯周浩鼎亦問政府會否「主動出擊」邀請國際歌星來港，認為其他地方有類似做法。楊潤雄表示倘有適當時機，將透過中介公司等邀請巨星來港。