【Emily】孫玉菡訪協康會 變爆炸頭畀小童吹髮

【明報專訊】勞福局長孫玉菡噚日同勞福局常秘劉焱、康復專員王秀慧、社署助理署長梁綺莉去咗參觀位於薄扶林嘅協康會綜合服務大樓，了解學前兒童康復服務同家長支援服務。孫玉菡喺facebook話要多謝一班小朋友喺參觀其間，同佢一齊模擬搭港鐵、過馬路、到超市買嘢同剪頭髮，過咗個溫情滿載嘅上午。佢仲一度戴住綠色「爆炸頭」假髮，畀小朋友幫佢吹頭。

孫玉菡話參觀大樓嘅慶華特殊幼兒中心嗰陣，觀察到唔少特殊需要學前兒童日常接受嘅訓練，包括物理治療、戶外遊樂場同攀石牆等設施，好開心得知全日制訓練同照顧幫助到幼兒發展成長。

佢又透露，曾經同在場家長及有特殊需要嘅實習青年交流，了解到佢哋嘅需要，當局會繼續聆聽服務使用者、業界、同工、家長嘅聲音，為有特殊需要兒童提供各種支援，畀佢哋可以盡展所能。