【Emily】明愛搞「星期日繽紛」外傭文化節

【明報專訊】唔少外傭離鄉別井來港工作，默默服務本港家庭，為咗推行勞動友善社會同促進文化共融，明愛亞洲外地勞工社會服務計劃嚟緊周日（28日）將舉辦「星期日繽紛」香港外傭文化節，邀請10幾間機構擺攤位，仲設有文化表演、傳統小食、外傭服務展覽等活動，希望畀放假嘅外傭放鬆吓。

主辦單位話活動旨在透過深入了解外傭生活狀况，促進僱主同外傭之間和諧嘅氛圍，仲希望提升本地社區對外傭嘅關心，因此除咗藉活動畀空間外傭放鬆一吓，都好歡迎僱主同本地家庭參與。

活動下周日朝早10點至下晝5點喺旺角登打士街休憩處、即家樂坊旁舉行，免費入場。活動邀請超過10個機構擺攤位，從多方面介紹外傭，展示佢哋家務以外嘅才能，例如縫紉、資源回收、藝術，現場仲有印尼傳統民族表演。