【Emily】李鎮強倡拍劇《選舉王子》宣傳區選 話要令選舉融入生活 謝偉俊憂「淪為笑柄」

【明報專訊】立法會一個小組委員會噚日開會，討論上月區議會選舉嘅宣傳工作。自由黨李鎮強認為要令選舉融入生活，建議開拍劇集《選舉王子》，並提出加強向來港專才宣傳。選委界謝偉俊就認為宣傳要適可而止，否則過度宣傳有失莊嚴，甚至「淪為笑柄」。

立法會「完善選舉實務安排事宜小組委員會」噚日開會，討論區選宣傳工作。李鎮強提出採用嶄新宣傳方式，「無論雜誌、書籍定係劇集，早輪有套好hit嘅（電視劇）《新聞女王》，可能整個《選舉王子》」。佢又認為，當局可以向來港專才宣傳，等佢哋取得永久居民身分後登記做選民。政制局長曾國衞無回應拍劇嘅建議，不過就話當局注意到來港嘅專才，會加強宣傳。

另倡向來港專才宣傳 曾國衞：會

謝偉俊話，事實係有過半市民對今次區選冷感，認為宣傳要適可而止，否則導致市民反感「愈谷就愈躺平」。佢認為投票係嚴肅嘅公民責任，過分宣傳有失莊嚴。

謝又提到今屆候選人違規懸掛直幡情况增加，「以往我哋唔敢擺過夜，今屆特別多」。佢質疑當局未有嚴正執法，「講一套做一套」，對守法嘅人唔公平，建議放寬規定。曾國衞回應會研究規定，但要顧及交通安全。