【Emily】3．16港鐵「動樂日」 6米綠鐵B迎客

【明報專訊】港鐵舊年推出「綠鐵B」公仔宣傳推動低碳環保形象。港鐵噚日公布，3月16日（周六）會喺中環海濱舉行首個「綠鐵B『動』樂日」，除咗會有約6米高嘅「綠鐵B」充氣裝置畀大家打卡，場內仲有嘢食有嘢玩，例如「綠動樂區」會有「電動小列車」畀小朋友化身車長駕駛Q版港鐵列車，「Go Green Bar」就會教大家以綠色為元素創作兩款活動限定飲品。

活動全日設4個特定時段入場，分別為朝早9點、11點，同埋下晝1點同3點半，每個時段都有人數限制，市民下月20號中午12點起可透過港鐵App登記預約免費入場，登記後會收到二維碼門票，每張門票最多容納4人同時入場，名額先到先得。另外，活動當日港鐵亦會贊助世界綠色組織主辦嘅「地球 ‧ 敢『動』行城市定向比賽」，希望可以一齊推動低碳綠色生活。